|
An' Ah Nex' Ting!
By de Queen Macoomeh
Racism was here before I born and ah bet it go be here after Basil come for me.
It have some people who would never like my head only because it attach to a darker colour skin dan deres.
I doh have time to worry about dem nuh. Dey could live how ever dey want. Just doh interfere or hamper me or my family. Dey could march everyday wearing all kine of cheap coverlet. Dey could wear dem pointy tip hat, dey could burn dey own Gawd cross from now until de sun light douse.
But doh put yuh dotish self in my way. Let me earn my wages, live in my house, drive my nice moto-cyah!
What do dem in chroot?
Dey vex because I prove to dem I as smart, as chupid, as goodlooking, as ugly, as tall as short as talented as wayward as dem ent? Dey vex because I prove dat I human too ent? Dey mout' push up because ah have riddum all up in mih backside ent?
Dey doh like my colour but yet still dey invent a coffin fuh dem to lie dong in and bun up dey skin ent?
Dey curlin' up dey head like mines ent?
Dey taking injection to round up dey backside and full out dey bus' and full in dey lips like mines ent?
And I see dem still watching mih when ah pass, admiring de bamsee. Yuh cah hate mih and want mih doux doux. Yuh cah be a sometime-ish racist.
But mark my words. It have racists of colour too yuh know?
Yes man!
Dem so does make my poor picky head hurt me de same way as de colourless ones. Dem want to replace de colourless ones and STILL enslave me.
Ah tired wid all of dem doh. Dem hole'in back tings all over de worl'.
Yuh know how long we would'ah expand and grow in dis universe if it wasn't for dem and dey nonsense?
All dey talking bout is Black dis, White dat, Chiney dis, Indian dat. When yuh hear de shout and we go six feet under it doh have no race after dat.
Is dus' to dus'.
All de lan' and money dey fight for stopping right here laughing at dem. Dey bones does turn to de same oil dey so cravayshous over.
Why dey doh fine dey own blinking planet and GO? I would help pay dey passage!
Discuss this
article on our message board
|
